এ কে গাৰ্নি

এ কে গাৰ্নী বা আল্‌বানাছ কিম্বল গাৰ্নী (ইংৰাজী: Albanus Kimball Gurney) (২৯ মে' ১৮৪৫- ১৯২৯) আমেৰিকাত জন্মগ্ৰহণ কৰা এগৰাকী খৃষ্টান পাদুৰী। মেইন প্ৰদেশৰ কলবী কলেজৰ পৰা শিক্ষা গ্ৰহণ কৰি ১৮৭৪ চনত পাদুৰী জীৱন গ্ৰহণ কৰে আৰু ১৮৭৬ চনত অসমলৈ আহি শিৱসাগৰৰ 'মিছন প্ৰেছ'ৰ দায়িত্ব গ্ৰহন কৰে। ১৮৮৩ চনত স্বদেশলৈ উভতি গৈ ২ বছৰ পাছত পুনৰাই অসমলৈ আহে। ১৯০৭ চনত অসমৰপৰা উভতি যায়। মূল হিব্ৰু ভাষাৰপৰা বাইবেলৰ 'অল্ড টেষ্টামেণ্ট'ৰ অসমীয়া ভাঙনিৰ কাম শেষ কৰে। ১৯০০ চনৰ শেষৰ ফালে এই ভাঙনিৰ কাম শেষ হয়। ১৯০৩ চনত ৮০৩ পৃষ্ঠাৰ বৃহৎ কলেৱৰৰ 'পুৰণী নিয়ম--Old Testament in Assamese' গ্ৰন্থ ছপা হৈ ওলায়। ইয়াৰ আগতে ১৮৮৬ চনত 'যিহুছুৱা আৰু বিচাৰ কৰ্তাৰ পুথি' আৰু 'ৰুথৰ বিৱৰণ' নাম দি কিছু অংশ প্ৰকাশ কৰিছিল। ১৮৭৭ চনত 'এলোকেশী বেশ্যাৰ কাহিনী' নামৰ এম.ই. লেছ্‌লীৰ সৰু বাংলা উপন্যাস অসমীয়ালৈ ভাঙি প্ৰকাশ কৰে। একেটা চনতে উপন্যাস জাতীয় গ্ৰন্থ 'কামিনীকান্তৰ চৰিত্ৰ' প্ৰকাশ কৰে। ১৮৭৬-৭৯-চনলৈ সম্ভৱত: 'অৰুণোদই'ৰ সম্পাদক আছিল। ১৯০৫ চনৰপৰা ১৯০৭ চনলৈ ডিব্ৰুগড়ৰ পৰা 'দীপ্তি' নামেৰে এখন ধৰ্মালোচনী সম্পাদনা আৰু প্ৰকাশ কৰিছিল ।

আল্‌বানাছ কিম্বল গাৰ্নী Albanus Kimball Gurney
জন্ম	২৯ মে' ১৮৪৫ মেইন, আমেৰিকা যুক্তৰাষ্ট্ৰ
মৃত্যু	১৯২৯
ৰাষ্ট্ৰীয়তা	আমেৰিকান
পেচা	খ্ৰীষ্টান মিছনেৰী, লেখক
জনা যায়	অ'ল্ড টেষ্টামেণ্টৰ অসমীয়া অনুবাদ "পুৰণী নিয়ম"ৰ লেখক

ব্যক্তিগত জীৱন

গাৰ্নীয়ে ভাৰতত থাকোঁতেই ১৮৭৭ চনত কলিকতাত মেৰী ফলেট লৰেঞ্চ (Mary Follet Laurence) নামৰ এগৰাকী মহিলাক বিয়া কৰায় আৰু তেওঁলোকৰ এলিজাবেথ কীলাৰ গাৰ্নী নামৰ এগৰাকী কন্যাৰ জন্ম হয়।

সাহিত্যৰাজি

• 'অল্ড টেষ্টামেণ্ট'ৰ অসমীয়া অনুবাদ ‘পুৰণী নিয়ম’
• এলাকেশী বেশ্যাৰ কথা (১৮৭৭)
• কামিনীকান্তৰ চৰিত্ৰ (১৮৭৭)
• কানি বেহেৰুৱাৰ কথা (১৮৭৮)
• ৰুথ আৰু যোছেফৰ কাহিনী (১৮৮১)
• ফুলমণি আৰু কৰুণাৰ কাহিনী