নিকা সংহতি

নিকা সংহতিত নাম আৰু ভকতৰ ওপৰত গুৰুত্ব দি আচাৰ-ক্ৰিয়া কঠোৰভাৱে পালন কৰা হয়। 'নিকা' শব্দৰ অৰ্থ নিৰ্মল, পৰিষ্কাৰ, পৱিত্ৰ। পৱিত্ৰ আৰু নৈষ্ঠিকভাৱে নাম আৰু ভকতক আশ্ৰয় কৰি ব্ৰহ্মতত্ত্বৰ কাষ চপা নিকা সংহতিৰ ঘাই লক্ষ্য। এই সংহতিৰ প্ৰধান বিচাৰ হ'ল বাহ্যাভ্যন্তৰ শুচিত অধিক গুৰুত্ব দিয়া। অৰ্থাৎ দৈহিক আৰু মানসিক শুদ্ধতাত কঠোৰ নীতি পালন কৰা হয়। যেনে, খোৱা-বোৱা কাৰ্য, স্পৰ্শাস্পৰ্শ আদিত বিশেষ গুৰুত্ব দিয়া হয়। এই বিচাৰত আত্ম-শুদ্ধিৰ ভাৱ জড়িত হৈ থাকে। মাধৱদেৱৰ আজ্ঞা অনুসৰি ধৰ্ম প্ৰচাৰত ব্ৰতী হোৱা বদুলা পদ্ম আতা আৰু মথুৰা দাস বুঢ়া আতা এই সংহতিৰ প্ৰৱৰ্তক।