পূৰ্নানন্দ দত্ত

পূৰ্ণানন্দ দত্ত (ইংৰাজী: Purnananda Dutta) অসমৰ এগৰাকী স্বাধীনতা সংগ্ৰামী। তেওঁৰ জন্ম হয় ১৯১২ চনৰ ৫ মাৰ্চত লক্ষীমপুৰ জিলাৰ ঢলপুৰত। তেখেতে ১৯৩২ চনত কংগ্ৰেছত যোগদান কৰিয়েই মহাত্মা গান্ধীৰ কঠোৰ আদৰ্শ মানি স্বাধীনতা আন্দোলনত জঁপিয়াই পৰে। ১৯৩৪-৩৫ চনৰ ২য় পৰ্যায়ৰ স্বাধীনতা সংগ্ৰামৰ পূৰ্ণ স্বৰাজৰ দাবিত হোৱা আইন অমান্য আন্দোলনত অংশ গ্ৰহণ কৰা সংগঠনৰ আন সদস্যৰ লগ হৈ তেখেতে খাদি প্ৰচলন, ৰাগীয়াল বস্তু, বিদেশী বস্ত্ৰ বৰ্জন আদিত আত্মনিয়োগ কৰে। ১৯৩৭ চনত সেৱাদলৰ কৰ্মীৰূপে ঘূৰি ফুৰোতে এবাৰ পুহমহীয়া জাৰৰ দিনত সোৱণশিৰি নদীৰ বালিত জুই পুৱাই ৰাতিটো পাৰ কৰিছিল। ১৯৪১ চনত মহাত্মা গান্ধীৰ নেতৃত্বত ৱাদ্ধাত হোৱা একক সত্যাগ্ৰহৰ লক্ষীমপুৰ ১৭ জনীয়া তালিকাত পূৰ্নানন্দ দত্তও এজন আছিল। সেই সত্যাগ্ৰহত গ্ৰেপ্তাৰ হৈ এবছৰ সশ্ৰম কাৰাদণ্ড খাটিছিল। তেখেতৰ চতুৰালিৰ বাবদ বৃটিছ চৰকাৰে এখন জেলৰ পৰা আন এখন জেললৈ স্থানান্তৰ কৰিছিল। ফকৰুদ্দিন আলি আহমেদৰ সৈতে তেখেতৰ সুসম্পৰ্ক আছিল। গান্ধীজীৰ বুনিয়াদী শিক্ষা পদ্ধতিৰ প্ৰচাৰ আৰু বুনিয়াদী সিক্ষাশ্ৰম স্থাপনৰ আধাৰত জিলাখনৰ বহু ঠাইত এল.পি স্কুল, হাইস্কুল আদি প্ৰতিষ্ঠা কৰিছিল। তেখেত মাধৱ দেৱ মহাবিদ্যালয়ৰ প্ৰতিষ্ঠাপক সম্পাদক আছিল। ১৯৬৯চনত মহকুমা পৰিষদৰ সভাপতি নিৰ্বাচিত হয়। ১৯৭২চনত বিধানসভাৰ নিৰ্বাচনত কংগ্ৰেছ দলৰ হৈ প্ৰতিদ্বন্দ্বিতা কৰিছিল যদিও পৰাজয় বৰণ কৰে। ১৯৭৩ চনৰ ৩১ মে তাৰিখে ভাৰতৰ প্ৰধানমন্ত্ৰীৰ হৈ সেই সময়ৰ অসমৰ মুখ্যমন্ত্ৰী শৰৎ চন্দ্ৰ সিংহই লক্ষীমপুৰ জিলাৰ ৫৬ গৰাকী মুক্তি যোদ্ধাক তাম্ৰপত্ৰ প্ৰদান কৰা সকলৰ ভিতৰত পূৰ্নানন্দ দত্তও এজন। ১৯৯৮ চনৰ ১২ জুলাইত এইজন মুক্তিযোদ্ধা স্বৰ্গগামী হয়।