ৰাজিনী গাবাৰা পূজা

ৰাজিনী গাবাৰা পূজা ডিমাছাসকলৰ এক লোক উৎসৱ। এইগৰাকী দেৱীৰ জনপ্ৰিয় নাম ৰণচণ্ডী দেৱী। ৰণচণ্ডী এখন দৈৱপ্ৰাপ্ত তৰোৱাল। এইখন তৰোৱাল এটি সাপৰ পৰা সৃষ্টি হৈছে বুলি তেওঁলোকে বিশ্বাস কৰে। তৰোৱালখনৰ সৈতে এটি জনশ্ৰুতি বিজড়িত হৈ আছে। "দিকপতি"য়ে সপোনত প্ৰাপ্ত তৰোৱালখন ৰণচণ্ডী মন্দিৰত স্থাপন কৰে বুলি তেওঁলোকে বিশ্বাস কৰে।

"দিকপতি"ৰ বিষয়ে "তিৱা সংস্কৃতিৰ ৰূপৰেখা" দ্বিতীয় খণ্ডত উল্লেখ কৰা আছে। উল্লিখিত দিকপতি ত্ৰিলোচন ৰজাৰ পুত্ৰ আৰু ত্ৰিলোচনৰ পিতাকৰ নাম ত্ৰিপুৰ। এওঁ ত্ৰিবেগ ৰাজ্যৰ পঞ্চদশজন ৰজা। এই পূজাত কুলৰ দেৱতাৰ পূজা'কুনাঙে'(গাওঁবুঢ়া)কৰিব লাগে। ৰাইজে তেওঁকহে এই পূজা কৰিবলৈ মনোনীত কৰে।

প্ৰতি বছৰে নতুন খেতি কৰাৰ আগতে ৰাজিনী গাবাৰা আৰু হৰণী গাবাৰা পূজা পালন কৰে।পূজাৰ দোকমোকালিতে গা-পা ধুুই পৱিত্ৰ মনে ন বস্ত্ৰ পৰিধান কৰি গাঁৱৰ প্ৰৱেশ পথ বন্ধ কৰি দিয়ে। কুনাঙে দুডাল বাঁহ গছ ক্ৰছ কৰি অৰ্ধবৃত্তাকাৰত মাাটিত পোতে। তেওঁ কণী এটি ভাঙি তাত ছটিয়াই দিয়ে। বলিকটা দাৰে সাতটি ঘাপ মাৰে। ডুলুুৱে গাাঁৱৰ এটা মূৰৰ পৰা আন এটি মূৰলৈ 'গেনা' পালন কৰিবলৈ জাননী প্ৰেৰণ কৰে। 'গেনা' শব্দটো আদিভাষাৰ। ইয়াৰ অৰ্থ হ'ল উৎসৱৰ কেইদিন কোনেও কৃষিকৰ্ম, ধান খুন্দা আদি কৰিব নোৱাৰে। পথৰ সন্মুখত এটা বাঁহৰ খুটা পুতি গাঁৱলৈ অহাৰ পথ বন্ধৰ জাননী দিয়ে। ওলোমাই ৰখা জাননী দেখিও যদি কোনো মানুহ গাঁৱত প্ৰৱেশ কৰে,তেওঁক সমুচিত দণ্ড বিহাৰ ব্যৱস্থা আছে। এই পূজাৰ পদ্ধতি অন্যান্য পূজাৰ  দৰেই। মূল পূজা দিনৰ বেলা হয়। গঞা ৰাইজে ভোজ ভাত খাই শেষ কৰাৰ পাছত ৰাতি পূজাৰ বাবে আয়োজন কৰে। ফুটুকলানিৰ মাজত এই পূজাৰ বাবে স্থান নিৰ্বাচিত কৰি লয়। কোনো মহিলাই বা কিশোৰীয়েও এই পূজা কাৰ্য চাব নেপায়। ৰাজিনী গাবাৰা পূজাৰ সময়ত কোনো মানুহে ভুলতো গাঁৱত প্ৰৱেশ কৰিব নাপায়। এনে ৰীতি ভঙ্গকাৰীক সেই গাঁৱত আগন্তুক কৃষ্ণ পক্ষলৈকে নজৰ বন্দী কৰি ৰখা হয়।