ৱিকিপিডিয়া:ৱিকিপত্ৰিকা/জুন-২০২৪/ৱিকিপিডিয়ানৰ মনৰ কথা
ৱিকিপিডিয়াৰ লগত বিশেষ চিনাকি আৰম্ভ হৈছিল এটি অপৰাধেৰে। ২০১২-১৩ চনৰ নতুনকৈ ওলোৱা এখন চিনেমাৰ ৱিকিপিডিয়াৰ প্ৰবন্ধত লগৰ এজনে নায়ক নায়িকাৰ নামৰ ঠাইত লগৰ কাৰোবাৰ নাম দি দিছিল আৰু সকলোকে দেখুৱাই ফুৰিছিল। তেতিয়া ইণ্টাৰনেট ইমান সহজলভ্য নাছিল। সৰু সৰু কামবোৰ মোবাইলত কৰিছিলোঁ যদিও ডাঙৰ কামবোৰ কলেজৰ লেবত কৰিবলগীয়া হৈছিল। ঘটনাটোৰ পৰা এটা কথা শিকিলোঁ যে, ৱিকিপিডিয়াত আমাৰ নিচিনা সাধাৰণ ব্যৱহাৰকাৰীয়েও সম্পাদনা কৰিব পাৰে।
অসমীয়া ভাষাৰ প্ৰতি ভালপোৱা বহু দিনৰ। কলেজত গৈ লগৰ এজনৰ লগত নতুন অভ্যাস এটা হৈছিল, সকলো কথা অসমীয়াত কোৱা। মোবাইলক ভ্ৰাম্যমাণ,পাঠ্যক্ৰমত থকা Thermodynamics- ক তাপগতি বিজ্ঞান, Theory of Machine -ক যন্ত্ৰ তত্ত্ব ইত্যাদি কোৱা আৰম্ভ কৰিছিলোঁ। তাৰ চাগৈ বহু শব্দ অসমীয়ালৈ অনুবাদ কেতিয়াও হোৱাই নাছিল। ২০১৫ চনৰ কথা, মহাবিদ্যালয়ৰ ফাৰুক আজিজ ছাৰে মাতি নি ক'লে, মহাবিদ্যালয় সপ্তাহৰ লগত অসমীয়া ৱিকিপিডিয়াৰ এখন কৰ্মশালা অনুষ্ঠিত হ'ব। ইচ্ছুক মানুহখিনিক কথা পাতি যোগদান কৰোৱাব লাগে।
সেইমতে ২৮ ফেব্ৰুৱাৰীত কৰ্মশালাখন অনুষ্ঠিত হ'ল। সমল ব্যক্তি হিচাপে বিষ্ণু দা আৰু নিতুল দা উপস্থিত আছিল। সেয়াই আৰম্ভণি; ঘৰৰ ওচৰৰ ঠাই, চকু ঘূৰালেই দেখা পোৱা বস্তুবোৰৰ কথা ইটো সিটো ৱিকিত লিখিবলৈ ধৰিলোঁ। মাজে মাজে শুধৰণি। এইদৰে যাত্ৰা চলি আছে, মাজতে অলপ কামৰ টনাটনিত বিৰতি হৈছিল যদিও আকৌ লাহে লাহে আৰম্ভ কৰিছোঁ।
ৱিকিপিডিয়া প্ৰকৃততে এটা আন্দোলন। নিজৰ ভাষাটো ডিজিটেল মাধ্যমত প্ৰতিষ্ঠা কৰাৰ যুঁজ। ১০ বছৰ আগতে অসমীয়া ভাষাত ভালকৈ একো নোপোৱা ডিজিটেল ক্ষেত্ৰখনত ৱিকিপিডিয়াৰ জৰিয়তে এতিয়া বহুতো তথ্যই উপলভ্য। এই যুঁজ সফল হওক। হাজাৰ বিজাৰ তেজাল ৰণুৱাই এই যুঁজৰ অংশীদাৰ হওক।
--ৰাম কিংকৰ মহন্ত (বাৰ্তা) 10:03, 31 May 2024 (ইউ.টি.চি.)