অনন্ত কলিতা

অনন্ত কলিতা (ইংৰাজী: Ananta Kalita) হৈছে অসম, ভাৰতৰ এগৰাকী অৰ্থনীতিবিদ, স্তম্ভ লেখক, নিবন্ধকাৰ, বাঁওপন্থী নেতা, আৰু ষ্টেট বেংক অৱ ইণ্ডিয়াৰ ভূতপূৰ্ব সঞ্চালক ৷ ডাক আৰু তাঁৰ সেৱাৰ জৰিয়তে কৰ্মজীৱনৰ পাতনি মেলি পৰৱৰ্তী সময়ত ষ্টেট বেংক অৱ ইণ্ডিয়াত যোগদান কৰা অনন্ত কলিতাই অৰ্থনীতি আৰু সামাজিক বিষয়ত একাধিক নিবন্ধ লিখি অসমৰ অ-কাহিনীমূলক সাহিত্যলৈ বিশিষ্ট বৰঙণি আগবঢ়াইছে। ৰাজনৈতিক দল চিপিআই(এম)ৰ সংস্পৰ্শলৈ অহা কলিতাই অসমৰ অন্ধবিশ্বাস-বিৰোধী অনুষ্ঠান ইলোৰা বিজ্ঞান মঞ্চৰ প্ৰতিষ্ঠাতো আগভাগ লৈছিল।

অনন্ত কলিতা Ananta Kalita
অনন্ত কলিতা
জন্ম	৩০ জুলাই, ১৯৪৭ বৰভাগ,নলবাৰী, অসম
মৃত্যু	২৭ আগষ্ট, ২০২৩ গুৱাহাটী, অসম
পেচা	বেংক বিষয়া অৰ্থনীতিবিদ নিবন্ধকাৰ লেখক
উল্লেখনীয় কৰ্মৰাজি	ষ্টেট বেংকৰ কৰ্মচাৰী আন্দোলনৰ লগত জড়িত ইলোৰা বিজ্ঞান মঞ্চৰ প্ৰতিষ্ঠাৰ লগত জড়িত সমকালীন অৰ্থনীতি:বিকল্প অন্বেষণৰ লেখক

কৰ্মজীৱন

অনন্ত কলিতাই জন্ম লাভ কৰিছিল অসমৰ নলবাৰী জিলাৰ বৰভাগ অঞ্চলৰ কমাৰকুচিত ৷ আনুষ্ঠানিক শিক্ষা শেষ কৰি কলিতাই ডাক আৰু তাঁৰ সেৱাত যোগদান কৰে৷ ১৯৭২ চনত উক্ত পদ ত্যাগ কৰি তেখেতে ষ্টেট বেংক অৱ ইণ্ডিয়াত নতুন কৰ্মজীৱনৰ পাতনি মেলে৷ ১৯৮৬ চনৰ পৰা ১৯৮৯ চনলৈকে তেখেত বেংকটোৰ কৰ্মচাৰী সন্থাৰ সভাপতি পদত অধিষ্ঠিত হৈছিল৷ ১৯৮৯ চনৰ পৰা ২০০৮ চন পৰ্যন্ত তেখেতে সন্থাৰ সাধাৰণ সম্পাদকৰ দায়িত্ব পালন কৰে৷ ষ্টেট বেংকৰ কৰ্মচাৰী আন্দোলনৰ লগত তেখেত এইদৰেই জড়িত হৈছিল৷

ষ্টেট বেংকৰ লগত জড়িত হৈ থকাৰ সময়ছোৱাত তেখেতে ভিতৰুৱা একাধিক অঞ্চলত বেংকৰ শাখা প্ৰতিষ্ঠা কৰাত গুৰুত্বপূৰ্ণ ভূমিকা লৈছিল৷ কৰ্মচাৰীৰ বাবে কো-অপাৰেটিভ ছ'ছাইটি বা সমবায় সমাজ খোলাতো কলিতাই আগভাগ লৈছিল৷

২০০১ চনত তেখেতে ষ্টেট বেংক অৱ ইণ্ডিয়াৰ সঞ্চালক পদ লাভ কৰে আৰু পৰৱৰ্তী আঠটা বছৰ অৰ্থাৎ ২০০৮ চনলৈকে তেখেত উক্ত পদত কৰ্মৰত হৈ থাকে৷ তেখেত ৰাজনীতিৰ প্ৰতিও আকৰ্ষিত হৈছিল আৰু ১৯৬৮ চনত তেখেতে চিপিআই(এম)ৰ লগত সংযুক্ত হয়৷ তেখেত চিপিআই(এম)ৰ অসম ৰাজ্যিক সমিতিৰ প্ৰাক্তন সদস্য আছিল৷

অনন্ত কলিতা ইলোৰা বিজ্ঞান মঞ্চৰ প্ৰতিষ্ঠাৰ লগত জড়িত হৈছিল।

লেখক জীৱন

এগৰাকী লেখক হিচাপে অনন্ত কলিতাই অসমীয়া অ-কাহিনীমূলক সাহিত্যলৈ অৱদান আগবঢ়াই থৈ গৈছে ৷ ১৯৭৩ চনতে তেখেতে নতুন পৃথিৱীৰ পাতত লেখক জীৱন আৰম্ভ কৰে৷ অৰ্থনীতিৰ লগত জড়িত হৈ থকা হেতুকে তেখেতে সাধাৰণ পাঠকৰ উপযোগী হোৱাকৈ অৰ্থনীতি-সম্পৰ্কীয় একাধিক প্ৰবন্ধ-নিবন্ধ লিখিছিল৷ ২০০৮ চনত চাকৰিৰ পৰা অৱসৰ লোৱাৰ পাছত তেখেত অসমীয়া কাকত-আলোচনীত নিয়মীয়াকৈ অৰ্থনীতি আৰু সামাজিক বিষয়ত লেখা-মেলা আৰম্ভ কৰে৷ অনন্ত কলিতা নতুন সাহিত্য পৰিষদৰ সভাপতি হৈছিল৷ পৰিষদৰ কলগাছিয়াৰ অধিৱেশনত তেখেতে সভাপতি হিচাপে কাৰ্যনিৰ্বাহ কৰে৷ তেখেতৰ দ্বাৰা লিখিত দুখনমান গ্ৰন্থ হৈছে:

• সমকালীন অৰ্থনীতি:বিকল্প অন্বেষণ,
• অসম আৰু অসমৰ জাতীয় সমস্যা,
• নব্য উদাৰ অৰ্থনীতি আৰু বিকল্প,
• বিশ্বায়িত সমাজখনৰ ভিন্ন চিন্তা আদি৷

মৃত্যু

২০২৩ চনৰ ২৭ আগষ্ট তাৰিখে ৭৬ বছৰ বয়সত অনন্ত কলিতাৰ এখন ব্যক্তিগত চিকিৎসালয়ত দেহাৱসান ঘটে৷ তেখেত ৰক্তজনিত কৰ্কট ৰোগত আক্ৰান্ত হৈ আছিল৷ গুৱাহাটীৰ নৱগ্ৰহ শ্মশানত তেখেতৰ শেষকৃত্য সম্পন্ন হয়৷