ৱিকিপিডিয়া:ৱিকিপত্ৰিকা/জুলাই-২০২৪/ৱিকিমিডিয়ানৰ মনৰ কথা
২০১৭ চনত মোৰ ৱিকিপিডিয়া একাউণ্ট খুলিছিলোঁ যদিও সেই সময়ত অসমীয়া ৱিকিপিডিয়াৰ সম্পাদনাৰ প্ৰক্ৰিয়া বা ৱিকিপিডিয়াৰ বিভিন্ন কাৰ্য আৰু নীতিৰ সৈতে মই মুঠেই পৰিচিত হোৱা নাছিলোঁ৷ মোৰ এই নেতিবাচক দিশৰ বাবেই আৰু ৱিকিপিডিয়াৰ নীতি, সম্পাদনা জ্ঞানৰ অভাৱে মোক এই মঞ্চত সক্ৰিয়ভাৱে অৰিহণা যোগাৱাত বাধা প্ৰদান কৰিছিল ৷ অৱশ্যে ডিজিটেল জগতত অসমীয়া ভাষা, সাহিত্য, সংস্কৃতি সংৰক্ষণৰ বাবে অসমীয়া ৱিকিপিডিয়াই যি প্ৰচেষ্টা হাতত লৈছে সেই প্ৰচেষ্টাই মোক সদায়েই আকৰ্ষিত কৰিছিল৷ প্ৰথম যেতিয়া ৱিকিপিডিয়াৰ জগতখনত ভৰি দিছিলোঁ তেতিয়া এই মঞ্চত অৰ্থপূৰ্ণ অৱদান আগবঢ়াব পৰা আত্মবিশ্বাসৰ অভাৱ আছিল৷ অসমীয়া ৱিকিপিডিয়াৰ প্ৰতি মোৰ আগ্ৰহ থকাৰ পিছতো সক্ৰিয় হৈ থাকিব পৰা নাছিলোঁ লগতে ৱিকিপিডিয়াৰ সম্পাদনা কৰ্মক মই প্ৰত্যাহ্বানজনক বুলি বিবেচনা কৰিলোঁ৷ মঞ্চখন আদৰণীয় হ’লেও মোৰ দৰে নবীন এজনৰ বাবে যেন এক অতিক্ৰম কৰিব নোৱাৰা দুৰ্গ যেন আছিল৷
পৰৱৰ্তী সময়ত মই তেজপুৰ বিশ্ববিদ্যালয়ৰ অসমীয়া বিভাগত স্নাতকোত্তৰ অধ্যয়নৰ বাবে নামভৰ্তি কৰিলোঁ৷ এই সিদ্ধান্ত মোৰ যাত্ৰাৰ এক নতুন আশাৰ ৰেঙণি৷ তেজপুৰ বিশ্ববিদ্যালয়ৰ পাঠ্যক্ৰমে মোক ব্লগিং আৰু ডেস্কটপ পাব্লিছিং আদি বিভিন্ন কাৰিকৰী দিশৰ সৈতে পৰিচয় কৰাই দিয়াৰ লগতে অসমীয়া ৱিকিপিডিয়াৰ প্ৰতি মোৰ আগ্ৰহ পুনৰ জগাই তুলিলে আৰু ৱিকিপিডিয়াৰ বিভিন্ন দিশ সমূহ বুজি পোৱাত সহায় কৰিলে৷ বিশ্ববিদ্যালয়ৰ পাঠ্যক্ৰমৰ জৰিয়তে অসমীয়া ৱিকিপিডিয়াৰ সৈতে পুনৰ পৰিচিত হ’লোঁ৷ গাঁথনিগত শিক্ষণ পৰিৱেশে মোক ৱিকিপিডিয়াৰ কাম-কাজ ভালদৰে বুজিবলৈ সহায় কৰিলে৷ সম্পাদনাৰ সূক্ষ্মতা, উদ্ধৃতিৰ গুৰুত্ব, মঞ্চৰ সম্প্ৰদায়-চালিত প্ৰকৃতি আদি বুজিবলৈ ধৰিলোঁ৷ মোৰ অধ্যাপক আৰু সহপাঠীসকলৰ পৰা পোৱা সমৰ্থন এই শিক্ষণ প্ৰক্ৰিয়াত যথেষ্ট সহায়ক আছিল৷ মোৰ যাত্ৰাৰ অন্যতম উল্লেখযোগ্য ব্যক্তিজশ হৈছে তেজপুৰ বিশ্ববিদ্যালয়ৰ অসমীয়া বিভাগৰ অতিথি অধ্যাপক, গুৱাহাটী বিশ্ববিদ্যালয়ৰ গৱেষক, সক্ৰিয় অসমীয়া ৱিকিপিডিয়ান ভাস্কৰ ভূঞা ৷ তেওঁৰ সক্ৰিয় সহযোগিতাই উৎসাহ আৰু আশাৰ ইন্ধন যোগালে৷ ভাস্কৰ ভূঞাই কেৱল কাৰিকৰী সাহায্য প্ৰদান কৰাই নহয়, অসমীয়া ভাষা-সংস্কৃতি ৰক্ষাৰ কামত তেওঁৰ সমৰ্পণেৰেও মোক অনুপ্ৰাণিত কৰিছিল৷
তেওঁৰ মেণ্টৰশ্বিপৰ অধীনত মই সঠিকতা, নিৰপেক্ষতা আৰু সম্যক গৱেষণাৰ গুৰুত্ব জানিলোঁ, শিকিলোঁ৷ তেওঁৰ উৎসাহ আৰু গঠনমূলক প্ৰতিক্ৰিয়াই মোক মোৰ দক্ষতা বৃদ্ধি কৰাত সহায় কৰিছে আৰু মোৰ আত্মবিশ্বাস বৃদ্ধি কৰিছে৷ আৰু তেতিয়াৰ পৰাই মই অসমীয়া ৱিকিপিডিয়া সম্পাদনাত নিয়োজিত হৈছোঁ৷ মোৰ অৱদানসমূহে অসমীয়া সাহিত্য, ঐতিহাসিক ঘটনা, উল্লেখযোগ্য ব্যক্তিত্ব, সাংস্কৃতিক প্ৰথাকে ধৰি বিভিন্ন বিষয়ক সামৰি লৈছে৷ ২০২৪ চনৰ ২ জুন তাৰিখে তেজপুৰৰ অগ্নিগড়ত অনুষ্ঠিত অসমীয়া ৱিকিপিডিয়াৰ ২৩ সংখ্যক জন্মদিন উদযাপন আৰু চন্দন চিৰিং ফুকন স্মৃতিগ্ৰন্থ উন্মোচনী অনুষ্ঠানত অংশগ্ৰহণ কৰাৰ সৌভাগ্য লাভ কৰিলোঁ৷ এই অনুষ্ঠানটো মোৰ যাত্ৰাৰ এক মাইলৰ খুঁটি আছিল৷ সহযোগী ৱিকিপিডিয়ানসকলক লগ পোৱাৰ, ধাৰণা বিনিময় কৰাৰ এক সুযোগ লাভ কৰিছিলোঁ৷ অসমৰ বিভিন্ন প্ৰান্তৰ পৰা অংশগ্ৰহণ কৰা সদস্যসকলৰ নিষ্ঠা আৰু উৎসাহ দেখি অনুপ্ৰাণিত হৈছিলোঁ৷
আগন্তুক দিনবোৰত মই অসমীয়া ৱিকিপিডিয়াৰ সৈতে সক্ৰিয়ভাৱে জড়িত হৈ থাকিবলৈ প্ৰতিশ্ৰুতিবদ্ধ৷ মোৰ আশা পৃথিৱীৰ প্ৰতিটো সম্পদ ইংৰাজীত যিদৰে উপলভ্য, সেইদৰে অসমীয়া ভাষাত উপলভ্য হোৱাটো৷ এয়া কোনো সহজ কাম নহয়, কিন্তু সামূহিক প্ৰচেষ্টাৰে ই সাধনযোগ্য৷ নতুন প্ৰজন্মক বিশেষকৈ ছাত্ৰ-ছাত্ৰীসকলক অসমীয়া ৱিকিপিডিয়াত সক্ৰিয়ভাৱে অংশগ্ৰহণ বিশেষ প্ৰয়োজন৷ অসমীয়া ৱিকিপিডিয়াৰ সম্পাদনা, তথ্যৰ ভৰাল চহকী, আৰু বহনক্ষমতাৰ বাবে তেওঁলোক জড়িত হোৱাটো অতি গুৰুত্বপূৰ্ণ৷ ৱিকিপিডিয়াই আমাৰ স্থানীয় ঐতিহ্য সংৰক্ষণৰ লগতে জ্ঞানৰ এক বিশ্বব্যাপী ভঁৰাললৈ অৰিহণা যোগোৱাৰ এক অনন্য সুযোগ আগবঢ়াইছে৷ অসমীয়া ৱিকিপিডিয়াৰ এই সমাজৰ এজন সদস্য হিচাপে মই নিজক লৈ গৌৰৱবোধ কৰোঁ ৷ মোৰ এই যাত্ৰাৰ সহায়ক হিছাপে ভাস্কৰ ভূঞা আৰু সমগ্ৰ অসমীয়া ৱিকিপিডিয়া সমাজৰ উৎসাহ আৰু সহায়ৰ বাবে কৃতজ্ঞতা জ্ঞাপন কৰিছোঁ৷
মই অসমীয়া ৱিকিপিডিয়াৰ কামত দায়বদ্ধ হৈ আছোঁ আৰু মোৰ অৱদান আগবঢ়াই নিবলৈ আগ্ৰহী৷ আমি সকলোৱে মিলি আমাৰ চহকী সাংস্কৃতিক ঐতিহ্য সংৰক্ষণ আৰু সকলোৰে বাবে সুলভ হোৱাটো নিশ্চিত কৰিব পাৰোঁ৷ আহক আমি আমাৰ মানুহৰ মাজত গৌৰৱ আৰু পৰিচয়ৰ ভাৱ গঢ়ি তুলি বিশ্বৰ প্ৰতিটো সম্পদ অসমীয়াত উপলভ্য কৰাৰ দিশত কাম কৰোঁ৷