সেউতী (আলোচনী)
সেউতী (ইংৰাজী: Xeuti) আছিল অসমীয়া ভাষাত যুগুত কৰা এখনি হাতেলিখা আলোচনী৷ 'সেউতী' অসমৰ প্ৰথমখন হাতেলিখা আলোচনী৷[1] অসমৰ কটন কলেজৰ কেইগৰাকীমান শিক্ষাৰ্থীৰ উমৈহতীয়া প্ৰচেষ্টাত ১৯০৭ চনত এই হাতেলিখা আলোচনীখন পোনপ্ৰথমবাৰৰ বাবে মুকলি কৰা হৈছিল৷ 'সেউতী'ৰ প্ৰতিষ্ঠাপক সম্পাদক আছিল সৰ্বেশ্বৰ বৰুৱা৷ আলোচনীখন প্ৰায় আঠবছৰ ধৰি প্ৰকাশ পাইছিল৷
| সম্পাদক | সৰ্বেশ্বৰ বৰুৱা (প্ৰতিষ্ঠাপক সম্পাদক), সূৰ্যকুমাৰ ভূঞা, দণ্ডিনাথ কলিতা, তাৰক চন্দ্ৰ গোস্বামী |
|---|---|
| দেশ | ভাৰত |
| ভাষা | অসমীয়া |
ইতিহাস সম্পাদনা কৰক
১৯০১ চনত কটন কলেজ প্ৰতিষ্ঠা হৈছিল৷ সেইসময়ৰ অসমত ছপাশালৰ সংখ্যা মুঠেই কম আছিল৷ সেইকাৰণে শিক্ষানুষ্ঠানসমূহে হাতেলিখা আলোচনী উলিওৱাৰ এটা নবপৰম্পৰাৰ গঢ় দিছিল৷ ১৯০৭ চনত কটন মহাবিদ্যালয়ত সৰ্বেশ্বৰ বৰুৱাই আন সতীৰ্থ শিক্ষাৰ্থীৰ লগ লাগি 'সেউতী' প্ৰস্তুত কৰি উলিয়ায়৷[1] উল্লেখ্য যে, সৰ্বেশ্বৰ বৰুৱাই ১৯০৭ চনৰ প্ৰৱেশিকা পৰীক্ষাত ব্ৰহ্মপুত্ৰ উপত্যকাৰ ভিতৰতে প্ৰথম স্থান অধিকাৰ কৰি কটন মহাবিদ্যালয়ত যোগদান কৰে৷ সৰ্বেশ্বৰ বৰুৱাৰ জন্ম হৈছিল ১৮৯১ চনত আৰু দেহাৱসান ঘটিছিল ১৯৭৫ চনত৷ তেখেতে পাছলৈ লখিমপুৰক প্ৰতিনিধিত্ব কৰি অসম বিধান পৰিষদ আৰু অসম বিধানসভাৰ সদস্য হৈছিল৷
আলোচনীখনৰ বিষয় সম্পাদনা কৰক
'সেউতী' আলোচনীতেই সৰ্বেশ্বৰ বৰুৱাই লাচিত বৰফুকনৰ বিষয়ে এটা নিবন্ধ লিখিছিল৷ স্মৰণযোগ্য যে, এইটোৱেই লাচিত বৰফুকনৰ বিষয়ে যুগুত কৰা প্ৰথমটো নিবন্ধ৷ সেইহেতুকে অসমত লাচিত বৰফুকনৰ বিষয়ে চৰ্চা কৰা সৰ্বেশ্বৰ বৰুৱাই বোধহয় প্ৰথমজন ব্যক্তি৷ পৰৱৰ্তী সময়ত আলোচনীখনৰ সহকাৰী সম্পাদক হিচাপে কাৰ্যনিৰ্বাহ কৰা তাৰক চন্দ্ৰ গোস্বামীয়ে আলোচনীৰ বাবে একাধিক বেটুপাত অংকন কৰিছিল৷ [1]
সম্পাদকসকল সম্পাদনা কৰক
সেউতীৰ কেইগৰাকীমান সম্পাদক হৈছে-
- সৰ্বেশ্বৰ বৰুৱা (প্ৰতিষ্ঠাপক)
- সূৰ্যকুমাৰ ভূঞা
- দণ্ডিনাথ কলিতা
- তাৰক চন্দ্ৰ গোস্বামী
তথ্যসূত্ৰ সম্পাদনা কৰক
- ↑ 1.0 1.1 1.2 বৈশ্য, পৰেশ (২০ ডিচেম্বৰ, ২০২১). "অসমৰ হাতেলিখা আলোচনীৰ এক দীঘলীয়া ইতিহাস". দৈনিক অসম. প্ৰকাশক গুৱাহাটী. পৃষ্ঠা ৪. https://dainikasam.assamtribune.com/full-page-pdf/epaper/pdf/2021/12/20/dainik-asam/3263/epaper-page-4?infinitescroll=1। আহৰণ কৰা হৈছে: 21 December 2021.