গাঁঠিয়ন খুন্দা: বিভিন্ন সংশোধনসমূহৰ মাজৰ পাৰ্থক্য

 

 

গাঁঠিয়ন খুন্দা পৰ্বটো বিয়াৰ অধিবাসৰ দিনা পালন কৰা হয়। অধিবাস পূজা সম্পাদন কৰাৰ অন্তত কইনাক মড়লৰ কাষত বহুওৱা হয়। তেওঁৰ সন্মুখত এখন শিলৰ পটা ৰখাৰ লগতে গাঁঠিয়ন মুঠা, গন্ধ-বিৰিণা আদি ৰখাৰ নিয়ম। কইনাক পটাখনৰ ওপৰত থকা পটাগুটিটো ধৰিবলৈ দিয়া হয়। সেই সময়ত তেওঁক বেৰি ধৰি থকা আন চাৰিগৰাকী অকুমাৰী ছোৱালীয়ে কইনাৰ লগতে পটাগুটিত ধৰি গাঁঠিয়ন খুন্দিব লাগে। অৱশ্যে কিছু কিছু অঞ্চলত চাৰিগৰাকী অকুমাৰী ছোৱালীৰ পৰিৱৰ্তে কইনাকে ধৰি সাতগৰাকী আয়তীয়ে গাঁঠিয়ন খুন্দাৰ নিয়ম ৷ এনেদৰে গাঁঠিয়ন খুন্দি থকাৰ সময়ত তাত উপস্থিত থকা আয়তীসকলে নাম গায় আৰু উৰুলি দিয়ে। এই সময়ত গোৱা নাম এনেধৰণৰ—

 

নামনি ৰাজ্যৰ পটা ৰাম হৰি হৰি ৷

কন্যাৰ মাক অতি সুলক্ষণী,

আপুনি ধৰিলে পটা ৰাম হৰি হৰি ৷

বেৰৰ মকৰা এ স্বৰ্গৰ অপেচৰা,

কি কৈ বিয়া ৰাম হৰি হৰি ৷

দিনত বন্দী হ'ল এ তেজী সূৰুয,

ৰাতি বন্দী হ'ল তৰা ৰাম হৰি হৰি ৷

মকৰা জালতে এ কৃষ্ণ বন্দী হ'ল,

কিনো ৰুক্মিণীৰ মায়া ৰাম হৰি হৰি ৷

চন্দ্ৰও চিকণ এ সূৰুযো চিকণ,

চিকণ স্বৰ্গৰ তৰা ৰাম হৰি হৰি ৷

সদৌতকৈ চিকণ এ আমাৰে ময়নী,

সবাৰে মন মোহিত কৰা ৰাম হৰি হৰি ৷

বাঁৰীও নাহিবি এ খাঁৰীও নাহিবি,

আহিবি স্বামী শুৱা ৰাম হৰি হৰি ৷

সাত আয়তীয়ে এ গাঁঠিয়ন খুন্দিছে,

 

গাঁঠিয়ন খুন্দাৰ সময়ছোৱাত কইনা আৰু আয়তীসকলৰ মূৰৰ ওপৰত এখন কাপোৰ ধৰি থকাৰ নিয়ম। এনেদৰে কাপোৰ ধৰি থকাৰ সুবিধা লৈ আয়তীসকলৰ মাজত এক নিৰ্দোষ ধেমালি কৰাৰ সুযোগো ওলায়। কাপোৰখনৰ আঁৰ লৈ ইগৰাকী আয়তীয়ে সিগৰাকীৰ চাদৰ বা কাপোৰত কাঠৰ টুকুৰা, শিল, ইটা আদি বান্ধি উঠিব নোৱৰা অৱস্থা কৰে। এয়া তেওঁলোকৰ বাবে আনন্দৰ উৎস। খুন্দাৰ পিছত গাঁঠিয়নখিনি তেলত ডুবাই দূবৰিৰ আগেৰে কইনাৰ মূৰত অলপ অলপকৈ দিয়াৰ নিয়ম৷ গাঁঠিয়ন খুন্দা শেষ হোৱাৰ পিছত ঘৰৰ এজন সদস্যই কইনাক তিনিবাৰ হবিষান্ন খুৱাই দিয়ে। ইয়াৰ পিছত মোমায়েকে ভিতৰলৈ  দাঙি নিয়াৰ নিয়ম৷ এনেদৰেই গাঁঠিয়ন খুন্দা পৰ্বটোৰ সামৰণি পৰে।