মধুৰাম বড়ো

মধুৰাম বড়ো অসমৰ এগৰাকী বিশিষ্ট সাহিত্যিক, সম্পাদক তথা শিক্ষাবিদ৷ তেওঁ উত্তৰ পূৰ্বাঞ্চলৰ ভিতৰত ভাষা বিজ্ঞানৰ প্ৰথম স্নাতকোত্তৰ। তেওঁ ২০০২ চনৰ সাহিত্য অকাডেমি বঁটা লাভ কৰিছিল৷ তাৰোপৰি তেওঁ ২০০২ চনত অসম চৰকাৰৰ সাহিত্যিক পেঞ্চন লাভ কৰে৷ ২০১৪ চনৰ ২৪ মাৰ্চ তাৰিখে তেওঁৰ মৃত্যু হয়৷

মধুৰাম বড়ো
জন্ম	১ নৱেম্বৰ, ১৯৩৮ কামৰূপ জিলাৰ হাজো
মৃত্যু	২৪ মাৰ্চ , ২০১৪
পেচা	লেখক, সাংবাদিক

প্ৰাৰম্ভিক জীৱন

১৯৩৮ চনৰ ১ নৱেম্বৰত কামৰূপ জিলাৰ হাজোত মধুৰাম বড়োৱে জন্মগ্ৰহণ কৰে। ১৯৫৫ চনত তেওঁ প্ৰবেশিকা পৰীক্ষাত উত্তীৰ্ণ হয়৷ ১৯৫৭ চনত উচ্চ মাধ্যমিক পৰীক্ষাত উত্তীৰ্ণ হৈ তেওঁ ১৯৫৯ চনত গুৱাহাটী বিশ্ববিদ্যালয়ৰ পৰা স্নাতক ডিগ্ৰী লাভ কৰে৷ ইয়াৰ পিছত তেওঁ ১৯৬৫ চনত পুনে বিশ্ববিদ্যালয়ৰ পৰা স্নাতকোত্তৰ ডিগ্ৰী লাভ কৰে৷ এই বিশ্ববিদ্যালয়ৰ পৰাই তেওঁ সাংস্কৃতিক নৃতত্ত্ব (কালচাৰেল এনথ্ৰ'প'লজি) বিষয়ত ডিপ্লমাৰ লগতে জাৰ্মান আৰু ফ্ৰেন্স ভাষা শিক্ষাৰ চাৰ্টিফিকেট লাভ কৰে৷

কৰ্মজীৱন

শিক্ষকতা

মধুৰাম বড়োৱে মনিয়াদি হাই মাদ্ৰাছাত সহকাৰী শিক্ষক হিচাপে কৰ্ম জীৱনৰ পাতনি মেলে৷ পৰৱৰ্ত্তী কালত তেওঁ ৰামদিয়া উচ্চ ইংৰাজী বিদ্যালয় আৰু হাজো উচ্চতৰ মাধ্যমিক বিদ্যালয়, উত্তৰ গুৱাহাটীৰ একে ইনটিউটতো সহঃ শিক্ষক হিচাপে আৰু ৰঙিয়া মধুকুছিৰ কছাৰী মহল হাইস্কুলৰ প্ৰধান শিক্ষক হিচাপে কাৰ্যনিৰ্বাহ কৰে৷ ১৯৭৫ চনত তেওঁ গুৱাহাটী বিশ্ববিদ্যালয়ৰ ভাষা বিভাগত যোগদান কৰে৷ ১৯৯৮ চনৰ ৩১ অক্টোবৰত মধুৰাম বড়োৱে বিশ্ববিদ্যালয়ৰ বড়ো ভাষাৰ মুৰব্বী অধ্যাপক হিচাপে অৱসৰ গ্ৰহণ কৰে৷

তাৰোপৰি মধুৰাম বড়োৱে প্ৰথম শ্ৰেণীৰ পৰা দশম শ্ৰেণীলৈ বড়ো ভাষাৰ পাঠ্যপুথি তথা স্নাতকোত্তৰ ডিগ্ৰী পৰ্য্যায়ৰ বাবে অন্যান্য পাঠ্যপুথি প্ৰণয়ন কৰিছিল৷

সাংবাদিকতা

মধুৰাম বড়োৱে 'সংবাদ সাপ্তাহিক' নামৰ অসমীয়া, বড়ো, ইংৰাজী তথা উত্তৰ-পূবৰ অন্য কেইবাটাও ভাষাত প্ৰকাশিত এখন সাপ্তাহিকৰ সম্পাদনা কৰে৷ তাৰোপৰি তেওঁ অসমীয়া জনমত (সপ্তাহিক), নতুন দিন কাকতৰো সম্পাদকৰূপে কাৰ্য্যনিৰ্বাহ কৰে৷ ২০০৬ চনত তেওঁ আজি কাকতত সম্পাদক হিচাপে যোগদান কৰে৷

সাহিত্যচৰ্চা

মধুৰাম বড়োৱে ৭০ খন বড়ো, অসমীয়া তথা ইংৰাজী ভাষাৰ গ্ৰন্থ ৰচনা কৰা বুলি জনা যায়৷ তাৰোপৰি তেওঁ পাঁচখন বাতৰিকাকত, আলোচনী সম্পাদনা কৰে আৰু ৫০০ ৰো অধিক প্ৰবন্ধ প্ৰকাশ পাইছে৷

মৃত্যু

২০১৪ চনৰ ২৪ মাৰ্চ তাৰিখে ৭৬ বছৰ বয়সত তেওঁৰ মৃত্যু হয়৷ মৃত্যুৰ সময়ত তেওঁ পত্নী আৰু দুগৰাকী জীয়ৰীক এৰি যায়৷

অৱদান

বড়ো ভাষাত গ্ৰন্থ

• আবাউনি গামি (বড়ো উপন্যাস)
• মুংখলুংনি হাংগামা (বড়ো কবিতা পুথি)
• বড়ো চল'বাথা
• হাড়িমু আৰু বড়ো হাৰিমু
• গেজেৰ ৰাওখান্থি
• গৌজৌৰাওখান্থি

ইংৰাজী ভাষাত গ্ৰন্থ

• হাউ টু এডৰ্লি (কবিতা পুথি)
• দা ষ্ট্ৰাকছাৰ অৱ দা বড়ো লেংগুৱেজ
• দা ষ্ট্ৰাকছাৰ অৱ দা আছামিছ লেংগুৱেজ
• আছামিছ এণ্ড বড়ো
• দা হিষ্টৰিকেল ডেভেলপমেন্ট অৱ বড়ো লেংগুৱেজ
• দা হিষ্টৰী অৱ বড়ো লেংগুৱেজ

অসমীয়া ভাষাত গ্ৰন্থ

• বড়ো লোক সাহিত্য
• বড়ো সাধুকথা
• বড়ো লোকগীত
• আইতাৰ শিশুগ্ৰাম

বঁটা আৰু সন্মান

• ২০০২ চনৰ সাহিত্য অকেডেমিৰ 'ভাষা সন্মান'
• ২০০২: অসম চৰকাৰৰ সাহিত্যিক পেঞ্চন
• ভাৰতীয় দলিত সাহিত্য অকেদেমিৰ ড° আম্বেদকাৰ সাহিত্য বঁটা