ৰাজকুমাৰ ৰাও

ৰাজকুমাৰ ৰাও (ইংৰাজী: Rajkummar Rao) (জন্ম: ৰাজ কুমাৰ যাদৱ; ৩১ আগষ্ট ১৯৮৪) এগৰাকী ভাৰতীয় অভিনেতা। তেওঁ মূলতঃ হিন্দী চলচ্চিত্ৰত অভিনয় কৰে। ২০১০ চনৰ পৰা বৰ্তমানলৈকে তেওঁ ৩০খনতকৈও অধিক ছবিত অভিনয় কৰিছে। তেওঁ "ৰাষ্ট্ৰীয় চলচ্চিত্ৰ বঁটা", চাৰিটা "ফিল্মফেয়াৰ বঁটা" আৰু "এছিয়া পেচিফিক স্ক্ৰীণ বঁটা"কে ধৰি অসংখ্য বঁটা-বাহন তথা স্বীকৃতি লাভ কৰিছে। ২০১৭ চনত তেওঁ ফৰ্বছ ইণ্ডিয়াৰ "চেলিব্ৰিটি ১০০" তালিকাখনত স্থান পাইছিল।

ৰাজকুমাৰ ৰাও
২০২৩ চনত ৰাও
জন্ম	ৰাজ কুমাৰ যাদৱ ৩১ আগষ্ট, ১৯৮৪ (৪০ বছৰ) গুৰগাঁও, হাৰিয়ানা, ভাৰত
শিক্ষানুষ্ঠান	ভাৰতীয় চলচ্চিত্ৰ আৰু দূৰদৰ্শন প্ৰতিষ্ঠান
পেচা	অভিনেতা
সক্ৰিয় হৈ থকা সময়	২০১০–বৰ্তমান
দাম্পত্যসঙ্গী	পত্ৰলেখা পাল (বি. ২০২১)
বঁটা, সন্মান, পুৰস্কাৰ আদি	সম্পূৰ্ণ তালিকাখন চাওঁক

ভাৰতীয় চলচ্চিত্ৰ আৰু দূৰদৰ্শন প্ৰতিষ্ঠানত অধ্যয়ন সমাপ্তিৰ পিছত ৰাৱে এন্থলজী ছবি লাভ চেক্স ঔৰ ধোখা (২০১০)ৰ জৰিয়তে অভিনয়ত আত্মপ্ৰকাশ কৰে। ২০১২ চনত মুক্তিপ্ৰাপ্ত ছবি গেংছ অৱ ৱাছেপুৰ – পাৰ্ট ২ আৰু তালাছ: দ্য এন্সাৰ লাইজ উইথিন (২০১০) ছবিদুখনত তেওঁ সহযোগী ভূমিকা গ্ৰহণ কৰিছিল। ২০১৩ চনত কাই পো চে! আৰু শ্বাহিদ শীৰ্ষক ছবি দুখনত অভিনয়েৰে তেওঁ সমালোচকৰ প্ৰশংসা লাভ কৰাৰ লগতে কেৰিয়াৰৰ ব্ৰেকথ্ৰু লাভ কৰিছিল। শ্বাহিদ ছবিখনত তেওঁ অধিবক্তা শ্বাহিদ আজমীৰ চৰিত্ৰত অভিনয় কৰি তেওঁ "শ্ৰেষ্ঠ অভিনেতাৰ শিতানত ৰাষ্ট্ৰীয় চলচ্চিত্ৰ বঁটা" আৰু "শ্ৰেষ্ঠ অভিনেতাৰ শিতানত ফিল্মফেয়াৰ সমালোচক বঁটা" লাভ কৰে।

কুইন (২০১৪), আলিগড় (২০১৫), আৰু বৰেলী কি বৰ্ফী (২০১৭) আদি ছবিসমূহত সহযোগী চৰিত্ৰত অভিনয় কৰি তেওঁ ভূয়সী প্ৰশংসা লাভ কৰে। বৰেলী কি বৰ্ফী ছবিখনৰ বাবে তেওঁ "শ্ৰেষ্ঠ পাৰ্শ্ব অভিনেতাৰ শিতানত ফিল্মফেয়াৰ বঁটা" লাভ কৰে। ট্ৰেপড (২০১৬) আৰু নিউটন (২০১৭) নামৰ স্বতন্ত্ৰ ছবিখনত তেওঁ মুখ্য চৰিত্ৰত অভিনয় কৰিছিল, ট্ৰেপড ছবিখনৰ বাবে তেওঁ দ্বিতীয়বাৰৰ বাবে "শ্ৰেষ্ঠ অভিনেতাৰ শিতানত ফিল্মফেয়াৰ সমালোচক বঁটা" লাভ কৰিছিল আৰু নিউটন ছবিখনৰ বাবে তেওঁ "এগৰাকী অভিনেতাৰ শ্ৰেষ্ঠ অভিনয়ৰ শিতানত এছিয়া পেচিফিক স্ক্ৰীণ বঁটা" লাভ কৰিছিল। ২০১৮ চনত মুক্তিপ্ৰাপ্ত হৰৰ কমেডী ছবি স্ত্ৰী তেওঁৰ কৰ্মজীৱনৰ সৰ্বাধিক উপাৰ্জনকাৰী ছবি আছিল। ব্যংগাত্মক ছবি দ্য হোৱাইট টাইগাৰ (২০২১)ত অভিনয়েৰে তেওঁ প্ৰথমবাৰৰ বাবে ইংৰাজী ভাষাৰ ছবিত অভিনয়ৰ সুযোগ পাইছিল। লুডো (২০২০), মনিকা, অ’ মাই ডাৰ্লিং (২০২২) আৰু ভীড় (২০২৩) ছবিত অভিনয়েৰে তেওঁ অধিক প্ৰশংসা লাভ কৰে আৰু বাধাই দো (২০২২) ছবিত এগৰাকী ক্ল’জেটেড গে মেনৰ চৰিত্ৰত অভিনয়েৰে তেওঁ পুনৰবাৰ "শ্ৰেষ্ঠ অভিনেতাৰ শিতানত ফিল্মফেয়াৰ বঁটা" লাভ কৰে। বহুকেইখন ছবি ধাৰাবাহিকভাৱে বক্স অফিচত বিফল হোৱাৰ পিছত ২০২৪ চনত তেওঁ জীৱনীমূলক ছবি শ্ৰীকান্তত বিশেষভাৱে সক্ষম উদ্যোগপতি শ্ৰীকান্ত ব’ল্লাৰ চৰিত্ৰত অভিনয় কৰি প্ৰশংসা লাভ কৰাৰ লগতে ছবিখনেও ব্যৱসায়িক সফলতা লাভ কৰে।

প্ৰাৰম্ভিক জীৱন

২০২২ চনত পত্নী পত্ৰলেখা পালৰ সৈতে ৰাও

ৰাজ কুমাৰ যাদৱ নামেৰে ১৯৮৪ চনৰ ৩১ আগষ্টত ভাৰতৰ হাৰিয়ানাৰ গুৰগাঁৱৰ প্ৰেম নগৰত ৰাজকুমাৰ ৰাওৰ জন্ম হৈছিল। তেওঁলোকৰ বহল পৰিয়ালটোত তেওঁৰ দুজন ককায়েক-বায়েক আৰু তিনিজন কাজিন আছিল। তেওঁৰ পিতৃ সত্য প্ৰকাশ যাদৱ হাৰিয়ানাৰ ৰাজহ বিভাগৰ চৰকাৰী কৰ্মচাৰী, আৰু মাতৃ কমলেশ যাদৱ এগৰাকী গৃহিণী। ২০১৬ আৰু ২০১৯ চনত ক্ৰমে তেওঁৰ মাতৃ আৰু পিতৃৰ মৃত্যু হয়। এছ.এন. সিদ্ধেশ্বৰ ছিনিয়ৰ ছেকেণ্ডাৰী পাব্লিক স্কুলৰ পৰা উচ্চ মাধ্যমিকৰ শিক্ষা সম্পূৰ্ণ কৰি বিদ্যালয়ৰ নাটকত অংশ লৈছিল। তেখেতে দ্য আত্মা ৰাম সনাতন ধৰ্ম মহাবিদ্যালয়, (দিল্লী বিশ্ববিদ্যালয়)ৰ পৰা স্নাতক ডিগ্ৰী লাভ কৰে য'ত তেওঁ একেলগে ক্ষীতিজ থিয়েটাৰ গ্ৰুপ আৰু দিল্লীৰ শ্ৰী ৰাম চেণ্টাৰৰ সৈতে নাট্যকৰ্ম কৰি আছিল।

মনোজ বাজপেয়ীৰ দ্বাৰা প্ৰশংসিত হোৱাৰ পাছত তেওঁ অভিনেতা হোৱাৰ সিদ্ধান্ত লৈছিল। ২০০৮ চনত তেওঁ ভাৰতীয় চলচ্চিত্ৰ আৰু দূৰদৰ্শন প্ৰতিষ্ঠান (এফটিআইআই) পুনেত দুবছৰীয়া অভিনয় পাঠ্যক্ৰমত নামভৰ্তি কৰি চলচ্চিত্ৰজগতত কেৰিয়াৰ গঢ়িবলৈ মুম্বাইলৈ গুচি যায়। ৰাও এগৰাকী নিৰামিষভোজী। ২০১৪ চনত তেওঁ উপাধি যাদৱৰ পৰা ৰাও লৈ সলনি কৰাৰ লগতে নামত অতিৰিক্ত ‘এম’ও যোগ কৰে। তেওঁ কয় যে ইয়াৰ কাৰণ হ'ল- "ৰাও বা যাদৱ, দুয়োটা উপাধিৰ যিকোনো এটাকে ব্যৱহাৰ কৰিব পাৰো কাৰণ দুয়োটা পৰিয়ালৰে উপাধি। প্ৰথম নামত থকা ডাবল 'এম'ৰ কথা যিমানদূৰলৈকে মনত পৰে এয়া মোৰ মাৰ বাবেহে। তাই সংখ্যা বিজ্ঞানত বিশ্বাস কৰে।" তেওঁ আনুষ্ঠানিকভাৱে টাইকোৱাণ্ডোৰ প্ৰশিক্ষণ লাভ কৰিছে।

২০১০ চনৰ পৰাই অভিনেত্ৰী পত্ৰলেখা পালৰ সৈতে সম্পৰ্কত আছিল ৰাও। ২০২১ চনৰ ১৫ নৱেম্বৰত চণ্ডীগড়ত দুয়ো বিবাহপাশত আবদ্ধ হয়।

বাহ্যিক সংযোগ

• ৰাজকুমাৰ ৰাও সম্পৰ্কে ইণ্টাৰনেট মুভি ডাটাবেছত থকা তথ্য।