পদুমী গাজলু
পদুমী গাজলু (ইংৰাজী: Padumi Gajlu) হৈছে অসম, ভাৰতৰ এগৰাকী সাহিত্যিক, শিক্ষয়িত্ৰী, কবি আৰু চিত্ৰশিল্পী। বোকাখাতৰ এটি শ্ৰমিক পৰিয়ালত জন্মগ্ৰহণ কৰা পদুমী গাজলুৱে পৰৱৰ্তী সময়ত কলিকতাৰ বিশ্বভাৰতী বিশ্ববিদ্যালয়ৰ শান্তিনিকেতনৰ পৰা বাতিক শিল্পত[1] প্ৰশিক্ষণ লৈছিল আৰু এনে প্ৰশিক্ষণ গ্ৰহণ কৰা তেখেতেই আছিল চাহ জনগোষ্ঠীৰ প্ৰথমগৰাকী মহিলা।[2] তেখেত চাহ জনগোষ্ঠীৰ প্ৰথমগৰাকী চিত্ৰশিল্পী।[3][1] শিক্ষকতাৰ লগতে সাহিত্য-চৰ্চাতো সমপৰিমাণে মনোনিৱেশ কৰা পদুমী গাজুলুৱে 'সেউজীয়া সোণ', 'কাঁচা ঘামেৰ ভিজা আঁচেল' আদিৰ দৰে প্ৰবন্ধ-সংকলন লিখি উলিওৱাৰ লগতে 'কাঁশীফুল', 'নৱোদয়'ৰ দৰে একুৰিমান গ্ৰন্থৰ সম্পাদনা কৰিছে। অসমৰ বিভিন্ন কাকত-আলোচনীত তেখেতৰ দ্বাৰা লিখিত প্ৰায় শতাধিক প্ৰবন্ধ প্ৰকাশিত হৈছে। অসমৰ ভাষা-সাহিত্য আৰু বিশেষকৈ চাহ-জনগোষ্ঠীক নিজৰ অৱদানেৰে সমৃদ্ধ কৰাৰ বাবে গাজলুক সাহিত্যিক পেঞ্চনাৰ হিচাপে স্বীকৃতি দিয়াৰ লগতে এপিপিএল টাটা আইকন বঁটাৰ দৰে একাধিক বঁটা-সন্মানেৰে সন্মানীত কৰা হৈছে। পদুমী গাজলু হৈছে চাহ-জনগোষ্ঠীৰ প্ৰথমগৰাকী সাহিত্যিক পেঞ্চনাৰ। [3]
| পদুমী গাজলু | |
|---|---|
 পদুমী গাজলু | |
| জন্ম | পদুমী গাজলু ১৯৫২ বৰচাপৰি, বোকাখাত |
| মৃত্যু | ১৪-০৭-২০২২ যোৰহাট |
| ৰাষ্ট্ৰীয়তা | ভাৰতীয় |
| পেচা |
|
| জনা যায় | চাহ জনগোষ্ঠীৰ প্ৰথমগৰাকী চিত্ৰশিল্পী |
| বঁটা, সন্মান, পুৰস্কাৰ আদি |
|
জন্ম আৰু শিক্ষা
সম্পাদনা কৰক১৯৫২ চনত বোকাখাতৰ বৰচাপৰি চাহ বাগিচাত পদুমী হাজলুৰ জন্ম হৈছিল। তেখেতৰ জন্ম হৈছিল এটা শ্ৰমিকৰ পৰিয়ালত। পিতৃৰ নাম আছিল আদিৰাম গাজলু[1]। মাতৃৰ নাম আছিল নিৰজা গাজলু। [3] ১৯৬৯ চনত সদৌ অসম ভিত্তিত আয়োজন কৰা 'মহাত্মা গান্ধী' শীৰ্ষক ৰচনা প্ৰতিযোগিতাত প্ৰথম স্থান অধিকাৰ কৰে। [2] বিদ্যালয়ত পঢ়ি থকাৰ পৰাই গাজলু সাহিত্য আৰু সংস্কৃতিৰ বিভিন্ন কাৰ্যসূচীত অংশগ্ৰহণ কৰিছিল।
কৰ্মজীৱন
সম্পাদনা কৰক১৯৭৬ চনত স্নাতক চূড়ান্ত বৰ্ষৰ শিক্ষাগ্ৰহণ কৰি থকাৰ কালতেই পদুমী গাজলুৱে কলিকতাৰ বিশ্বভাৰতী শান্তি নিকেতনত[1] ৰূপাংকৰ কলাৰ দুবছৰীয়া পাঠ্যক্ৰম সফলতাৰে শেষ কৰিছিল। এনে পাঠ্যক্ৰম গ্ৰহণ কৰা আৰু শেষ কৰা পদুমী গাজলুৱেই হৈছে চাহ জনগোষ্ঠীৰ প্ৰথমগৰাকী মহিলা। ১৯৮১ চনত গাজলুৱে বোকাখাতৰ ৰজাবাৰী হাইস্কুলত 'ক্ৰাফট্ ডিজাইন'[2] বিষয়ৰ শিক্ষয়িত্ৰী হিচাপে কৰ্ম-জীৱনৰ পাতনি মেলিছিল। একেটা সময়তে তেখেতে শিল্প-সাহিত্যৰ চৰ্চাও অব্যাহত ৰাখে।
চিত্ৰশিল্পী হিচাপে
সম্পাদনা কৰকশান্তিনিকেতনৰ পৰা শিক্ষালাভ কৰি অসমলৈ উভতি অহা পদুমী গাজলুয়ে অসমৰ চাহ জনগোষ্ঠীৰ পৰা অনেক সমল সংগ্ৰহ কৰে। ইয়াৰ লগতে চাহ জনগোষ্ঠীৰ শিল্প-সংস্কৃতিৰ গৱেষণাও কৰিছিল। তেখেতে বেণু মিশ্ৰ, পুলক গগৈ আদি বিশিষ্ট অসমীয়া চিত্ৰশিল্পীৰ দিক্-দৰ্শন আৰু অনুপ্ৰেৰণা লাভ কৰে আৰু বাতিক চিত্ৰত চাহ জনগোষ্ঠীৰ পৰম্পৰাগত আৰ্হি বা ডিজাইনবোৰক তুলি ধৰিবৰ প্ৰয়াস কৰে। বিদ্যালয়ত শিক্ষকতা কৰি থকাৰ লগতে পদুমী গাজলুৱে চাহ জনগোষ্ঠীৰ কিশোৰ-কিশোৰী আৰু মহিলাসকলক সংগঠিত কৰি ক্ৰাফট ডিজাইন, বাটিক আৰ্ট, আল্পনা ডিজাইন আদি শিকায়। [1]
সাহিত্যিক জীৱন
সম্পাদনা কৰক১৯৭০ চনৰ পৰাই পদুমী গাজলুৱে অসমৰ ভিন্ন কাকতত লেখা-মেলা কৰিবলৈ আৰম্ভ কৰিছিল। তেখেতে কবিতা, প্ৰবন্ধ আদিৰে সাহিত্য-চৰ্চাৰ পাতনি মেলে। ৰাজ্যৰ বিভিন্ন কাকত-আলোচনী, স্মৃতিগ্ৰন্থত তেখেতে লিখা শতাধিক প্ৰবন্ধ-ৰচনা আৰু কবিতা প্ৰকাশিত হৈছে। পদুমী গাজলুৰ এই লেখাসমূহ দৈনিক জনমভূমি, নীলাচল, অসম বাণী, আজিৰ অসম, অগ্ৰদূত আদি অসমীয়া কাকতত প্ৰকাশিত হৈছিল। মৃত্যুৰ পূৰ্বৱতী সময়ছোৱাত তেখেতে শিৰীষ আমাৰ কথা নামৰ আলোচনী এখন প্ৰকাশৰ প্ৰস্তুতি চলাই আছিল।[2]
পদুমী গাজলুৰ কেইখনমান প্ৰবন্ধ-সংকলন হৈছে: 'সেউজীয়া সোণ', 'কাঁচা ঘামেৰ ভিজা আঁচেল' আদি।
আনহাতে তেখেতে সম্পাদনা কৰা কেইখনমান গ্ৰন্থ হৈছে : (স্ব আৰু যুটীয়াভাৱে) : 'কাঁশীফুল', 'নৱোদয়', 'চান্দনী', 'বিবিধা', 'কৰম' আদি। তেখেতে প্ৰায় দুকুৰি গ্ৰন্থ আৰু স্মৃতিগ্ৰন্থ সম্পাদনা কৰিছে। [2]
অন্যান্য
সম্পাদনা কৰকপদুমী গাজলু প্ৰসাৰ ভাৰতীৰ সৈতেও জড়িত হৈছিল। প্ৰসাৰ ভাৰতীত তেখেতৰ কথিকা প্ৰচাৰ হৈছিল। [2] আকাশবাণী ডিব্ৰুগড় কেন্দ্ৰৰ পৰা প্ৰচাৰিত হোৱা চাহ বনুৱাৰ অনুষ্ঠানত তেখেতৰ চাহ বনুৱা শ্ৰমিকৰ জীৱন ধাৰা[3] শীৰ্ষক এই কথিকাখন প্ৰচাৰিত হৈছিল।
পদুমী গাজলু অসম সাহিত্য সভা, চাহ জনগোষ্ঠী সাহিত্য সভা, লেখিকা সমাৰোহ সমিতি, প্ৰয়াস অধ্যয়ন চক্ৰ আদি একাধিক অনুষ্ঠানৰ লগত জড়িত হৈছিল। [3]
১৯৯৬-৯৭ চনত তেখেতক অসম সাহিত্য সভাৰ কাৰ্যনিৰ্বাহক সমিতিলৈ বিশেষভাৱে আমন্ত্ৰিত কৰি সন্মানীয় সদস্য হিচাপে মনোনীত কৰা হৈছিল। [3]
ব্যক্তিগত জীৱন
সম্পাদনা কৰকপদুমী গাজলুৱে শ্ৰমিক নেতা ৰুকলাল কুৰ্মীৰ সৈতে যুগ্ম জীৱন আৰম্ভ কৰে। পৰৱৰ্তী সময়ত তেওঁলোক দুটি সন্তানৰ অভিভাৱক হয়। [1]
বঁটা-বাহন
সম্পাদনা কৰকপদুমী গাজলুৱে বিভিন্ন সময়ত লাভ কৰা বঁটা আৰু সন্মানসমূহ হৈছে :
(১) ৰাজ্যিক মহিলা সংহতি বঁটা, ১৯৭৫ চনত।
(২) এপিপিএল টাটা আইকন বঁটা
(৩) সাহিত্যিক পেঞ্চনাৰ (চাহ জনগোষ্ঠীৰ প্ৰথমগৰাকী সাহিত্য পেঞ্চনাৰ)
(৪) অসম সাহিত্য সভাৰ সেউজী প্ৰকাশ
(৫) অসম প্ৰকাশন পৰিষদৰ সেউজ গ্ৰন্থমেলা
(৬) প্ৰাগ প্ৰেৰণা বঁটা-২০২২
(৭) মেঘালয়ৰ নিউজ প্লাচ চেনেলৰ পৰা জীৱনজোৰা সাধনাৰ বঁটা
(৮) ৰিটি একাডেমীৰ পৰা জীৱনজোৰা সাধনাৰ বঁটা
(৯) অনুপ্ৰেৰণাৰদ্বাৰা জীৱনজোৰা সাধনাৰ বঁটা[2]
(১০) মেঘৰাজ কৰ্মকাৰ আৰু দেউৰাম তাছা বঁটা, ২০০০ চনত
(১১) দেউৰাম তাছা স্মাৰক বঁটা, ২০২২ চনত। (২০২২ চনৰ ১৮ জুলাইত[2] বঁটা গ্ৰহণ কৰাৰ কথা আছিল)
মৃত্যু
সম্পাদনা কৰক২০২২ চনৰ ১৪ জুলাইত[1] পদুমী গাজলুৱে উচ্চৰক্তচাপজনিত অসুস্থতাৰ সৈতে যুঁজি যোৰহাট চিকিৎসা মহাবিদ্যালয়ত শেষনিশ্বাস ত্যাগ কৰে।[2] মৃত্যুৰ কিছুদিন আগতে অসুস্থতাৰ বাবে তেখেতক এইখন চিকিৎসালয়ত ভৰ্তি কৰোৱা হৈছিল। বোকাখাতৰ লতাবাৰী ৰাজহুৱা শ্মশানত তেখেতৰ শেষকৃত্য সম্পন্ন কৰা হয়।
তথ্যসূত্ৰ
সম্পাদনা কৰক- ↑ 1.0 1.1 1.2 1.3 1.4 1.5 1.6 "চাহ জনগোষ্ঠীৰ একমাত্ৰ বাতিক চিত্ৰ শিল্পী, সাহিত্যিক পেঞ্চনাৰ, শিক্ষয়িত্ৰী পদুমী গাজলুৰ মৃত্যু". অসমীয়া প্ৰতিদিন. প্ৰকাশক গুৱাহাটী. Jul 15, 2022. https://www.asomiyapratidin.in/padumi-gajlu-passes-away/?date=15-08-2016। আহৰণ কৰা হৈছে: 17 July 2022.
- ↑ 2.0 2.1 2.2 2.3 2.4 2.5 2.6 2.7 2.8 "বিশিষ্ট শিল্পী, সাহিত্যিক পদুমী গাজলুৰ বিয়োগ". দৈনিক অসম. প্ৰকাশক গুৱাহাটী. ১৬ জুলাই ২০২২. পৃষ্ঠা ১ আৰু ৬. https://dainikasam.assamtribune.com/full-page-pdf/epaper/pdf/2022/07/16/dainik-asam/4081/epaper-page-6?infinitescroll=1। আহৰণ কৰা হৈছে: 17 July 2022.
- ↑ 3.0 3.1 3.2 3.3 3.4 3.5 "চাহ জনগোষ্ঠীৰ প্ৰথম সাহিত্যিক পেঞ্চনাৰ, শিক্ষয়িত্ৰী পদুমী গাজলুৰ মৃত্যু". দৈনিক জনমভূমি. প্ৰকাশক গুৱাহাটী. ১৬ জুলাই, ২০২২. পৃষ্ঠা ৩,৭. https://dainikjanambhumi.co.in/16072022/details.php?date=14-05-2014&page=3-7&article=13.jpg&cid=28664। আহৰণ কৰা হৈছে: 17 July 2022.[সংযোগবিহীন উৎস]
