বিগত দিনবোৰৰ পাত লুটিয়ালে আমি দেখা পাওঁ যে ২০১২ চনত অসমীয়া ৱিকিপিডিয়াৰ প্ৰৱন্ধ সংখ্যাই ১০০০ চুইছিল। ২০১৫ চনৰ জানুৱাৰী মাহত প্ৰৱন্ধৰ সংখ্যা ৩০০৬ লৈ বৃদ্ধি পোৱাত আমি আন এক মাইলৰ খুঁটিত উপনীত হৈছিলো। যোৱা বছৰটো ৩,৮৫০ টা প্ৰৱন্ধৰে সামৰাৰ পিছত অসমীয়া ৱিকিপিডিয়া পৰিয়ালৰ সদস্যসমূহৰ অশেষ যত্নৰ ফলত এই মাহত ৱিকিপিডিয়াখনৰ প্ৰৱন্ধৰ সংখ্যা ৪০৪৪ পাইছেগৈ। ৱিকিপিডিয়াৰ পৰিসংখ্যা মতে আজিৰ তাৰিখত (২ জুন, ২০১৬) অসমীয়া ৱিকিপিডিয়াৰ মুঠ পঞ্জীভুক্ত সদস্য ১৩,৯৯৪ গৰাকী হোৱাৰ বিপৰীতে সক্ৰিয় সদস্যৰ সংখ্যা ৪১। সেইদৰে ৱিকিউৎসতো লেখনিৰ সংখ্যা বৃদ্ধি পায়েই আছে। মাজে-সময়ে মন্থৰ হৈ পৰিলেও এই পৰিসংখ্যাটো আমি এককভাৱে চাই টপৰাই ক’ব পাৰোঁ যে অসমীয়া ৱিকিপিডিয়াই ধাৰাবাহিকভাৱে বিকাশ লাভ কৰি আছে। কিন্তু অসমীয়াৰ বহু পিছত ৱিকিপিডিয়াত অন্তৰ্ভুক্ত হোৱা ভাৰতীয় ভাষা যেনে হিন্দী, বাংলা, তামিল, তেলগু, মাৰাঠী, ভোজপুৰী, সংস্কৃত আদিৰ তুলনাত অসমীয়া ভাষাৰ প্ৰৱন্ধ আৰু ব্যৱহাৰকাৰীৰ সংখ্যা এতিয়াও বহু কম। সেই হিচাপত আমি এতিয়াও বহু পিচ পৰি থকাৰ লগতে ৱিকিপিডিয়া ব্যাৱহাৰকাৰীৰ কাষ চপাৰ ক্ষেত্ৰত শেহতীয়াকৈ বিশেষ উল্লেখযোগ্য সফলতা লাভ কৰিব পৰা নাই।
সক্ৰিয় সদস্যৰ বৃদ্ধিৰ লগে লগে প্ৰৱন্ধৰ সংখ্যা বাঢ়িছে। কিন্তু চাৰি-পাঁচটা শাৰী বা এটা দফাৰ প্ৰৱন্ধৰ লগতে তথ্যসূত্ৰবিহীন প্ৰৱন্ধ নিতৌ যোগ হৈয়েই আছে। এনে প্ৰৱন্ধই ৱিকিপিডিয়াৰ গুণগত মান আৰু আৰু নিৰ্ভৰযোগ্যতা হ্ৰাস কৰে। দ্বিতীয়তে, ইংৰাজী বা আন ভাষাৰ পৰা অনুবাদ কৰা প্ৰৱন্ধসমূহত সততে দেখিবলৈ পোৱা পৰিভাষিক আৰু বাক্য গাঁথনিৰ বিসংগতিয়ে ব্যৱহাৰকাৰী এজনক প্ৰায়ে নিৰুৎসাহ কৰাৰ থল থাকে। গতিকে অসমীয়া ৱিকিপিডিয়াক ৰাইজৰ কাষ চপাই নিবলৈ হ’লে এই দুয়োটা কাৰককে আঁতৰ কৰাত আমি সকলোৱে গুৰুত্ব আৰোপ কৰিব লাগিব আৰু তেতিয়াহে ৱিকিপিডিয়াৰ যোগেদি অসমীয়া ভাষাৰ সংৰক্ষণ তথা সংবৰ্ধনৰ প্ৰচেষ্টাই সফল ৰূপ পাব।
অসমীয়া ৱিকিপিডিয়াৰ সমূহ সদস্য আৰু ব্যৱহাৰকাৰীকে আন্তৰিক ওলগ আৰু অভিনন্দন জনালো। --চন্দন চিৰিং ফুকন
